गोरेगाव, 30 मार्च: गोरेगाव तालुका सहकारी खरिदी विक्री समिती मर्यादित अंतर्गत येणाऱ्या गोंदेखारी सर्वाटोला काली माठी येथील शासकीय आधारभूत धानखरिदी केंद्रात मोठ्या प्रमाणावर आर्थिक गैरव्यवहार उघडकीस आला आहे. या प्रकरणी गोरेगाव पोलिसांनी आरोपी रमेश वट्टी यांच्यासह चार जणांविरोधात गुन्हा दाखल केला आहे.
1.43 कोटी रुपयांचा गैरव्यवहार
संस्थेला मिळालेल्या करारनाम्यानुसार मिलर्सकडून धान उचल कमी देण्यात आल्याचे समोर आले आहे. संस्थेच्या धानखरिदी व्यवहारात स्वार्थासाठी हेराफेरी करून तब्बल 1 कोटी 43 लाख 72 हजार 310 रुपये गैरवापर केल्याची बाब उघड झाली आहे. यामुळे संस्थेच्या निधीचा अपहार झाल्याने संबंधितांवर कठोर कारवाई करण्याची मागणी होत आहे.
फिर्याद आणि पोलिस कारवाई
या गैरव्यवहाराचा पर्दाफाश शासकीय प्रमाणित लेखा परीक्षक हेमंतकुमार बिसेन यांनी ऑडिट अहवालाद्वारे केला. त्यांनी सहाय्यक निबंधक, सहकारी संस्था, गोरेगाव यांच्या लेखी आदेशानुसार पोलिस ठाण्यात तक्रार दाखल केली. 29 मार्च रोजी सायंकाळी 6 वाजता आरोपींविरुद्ध गुन्हा नोंद करण्यात आला. त्यानंतर पोलिसांनी 30 मार्च रोजी पहाटे 3:45 वाजता चार आरोपींना अटक केली.
आरोपींवर कोणते गुन्हे दाखल?
आरोपींवर फौजदारी स्वरूपाचे गुन्हे दाखल करण्यात आले असून त्यांच्यावर न्यासभंग आणि अपहाराचे आरोप ठेवण्यात आले आहेत. पोलिस तपास सुरू असून या प्रकरणातील इतर संबंधितांची चौकशी केली जात आहे. पुढील कारवाईसाठी पोलिस अधिक तपशीलवार तपास करत आहेत.
सहकारी संस्थांमध्ये होत असलेल्या आर्थिक गैरव्यवहारामुळे अनेक शेतकऱ्यांना फटका बसत आहे. अशा प्रकरणांवर कठोर कारवाई करण्याची मागणी स्थानिक पातळीवरून होत आहे.
1 thought on “गोरेगाव सहकारी समितीत 1.43 कोटींचा गैरव्यवहार, चौघांना अटक”